Drilla frå ein fregatt

VINTER TIL SJØS: I februar fann den taktiske øvinga NorTG stad om bord på KNM Roald Amundsen. I mars deltar fleire av dei same styrkane under Cold Response. Foto: VEGARD GRØTT

Sjøforsvaret sin generalprøve til storøvinga Cold Response går under namnet NorTG1. Gjennom ei veke i februar har det taktiske leiingsapparatet Norwegian Task Group (NorTG) drilla dei fleste marineavdelingane saman med aktiv øvingsverksemd. Stabs­sjefen i NorTG, kommandør Henning Amundsen, ser på øvingsdagane som verdifulle og nyttige.
– For første gong er heile NorTG-staben samla på eit fartøy frå den nye Nansen-klassen. Trass i at det manglar ein del ting før alt er på plass, ser det fantastisk bra ut, seier han.

Intensivt. Til vanleg nyttar NorTG kystvaktfartøyet på KV Andenes som kommandoplattform. Men med eit sjøforsvar i stadig utvikling har NorTG-staben no teke i bruk det moderne systemet til Nansen-klassen.
– Øvingsarbeidet om bord på KNM Roald Amundsen har fungert bra. Som evig optimist er eg hundre prosent sikker på at samarbeidet vert ein suksess i framtida, meiner stabssjefen.
Øvinga NorTG1 er den første av i alt fire store øvingar som Amundsen og staben hans skal delta på i år. Komm­andøren presenterer to punkt som står i høgsetet under NorTG1.
– At heile staben får gjort seg kjend med dei nye fregattane, er svært positivt for det vidare arbeidet. Det er mykje å ta tak i, og me lærer litt av kvarandre for kvar dag, seier han.
– For det andre brukar me denne øvinga til å trena på komplekse situasjonar der det fort vert eit intensivt tempo. Me skal stilla godt rusta til Cold Response, legg han til.

GENERALPRØVE: Dei aller fleste marine­avdelingane blei drilla under NorTG også innafor sanitet. Foto: VEGARD GRØTT

Fundament. Sjølv om NorTG-staben styrer øvingsaktiviteten frå fregatten KNM Roald Amundsen, samkøyrer staben fleire marineavdelingar under øvinga. I tillegg til Fregattvåpenet stiller Minevåpenet, Undervannsbåt­våpenet, Marinens logistikkvåpen og Taktisk båtskvadron, som er ein del av Marinens jegervåpen på øvinga.
– For å få best mogleg utbytte av øvinga er det viktig at alle våpna deltek. Øvinga samkøyrer oss på ein god måte fram mot Cold Response, meiner Amundsen.
Skipssjefen på KNM Roald Amundsen, kommandørkaptein Hans Petter Midttun, deler Amundsen sitt syn på det nye samarbeidet. Han meiner det er spanande og positivt.
– Det er svært viktig at NorTG kan koma om bord på fregatten for å utføra arbeidet sitt her. Denne øvingsveka vert eit fundament som me kan byggja vidare på, seier han.

Merkedag. Ettersom det nye samarbeidet er rykande fersk, har ikkje partane heilt sett saman suksessoppskrifta enno. Starten ser lovande ut, men det må framleis ein del ting på plass før alt kan fungera optimalt, meiner Midttun.
– Ein kvar relasjon byggjer på nærleik og tillit. På sikt trur eg at det nye samarbeidet kan bidra til at NorTG kan konsentrera seg meir om leiing og mindre om teneste. Me prøver etter beste evne å tilby våre tenester slik at NorTG-staben kan gi arbeidet sitt full merksemd, og ikkje noko anna, seier skipssjefen.
– NorTG1 har vore ei god og lærerik øving. I tillegg har han fått fram eit nytt og spanande samarbeid mellom oss og NorTG. Det er ein aldri så liten merkedag for historiebøkene, slår Midttun fast.

Fakta
■ Norwegian Task Group har til dagleg ansvaret for det sjøgåande operative leiingselementet på taktisk nivå. Denne gruppa kan leia ei gruppe fartøy som er sett saman for å løysa ei eller fleire oppgåver i fred, krise og krig.