Jubel i Bergen

TRENINGSSENTER: Den nye marinen har meir å glede seg til: slår Stortinget til, står dette anlegget klart til bruk på Haakonsvern om dryge to år. Illustrasjon: Longva Arkitekter AS.

I Regjeringa sitt budsjettforslag for 2008 blir Sjøforsvaret tildelt 343 millioner kroner til nytt militært treningssenter på Haakonsvern. For orlogskaptein og bergensar André Ringdal ved Skole for fysisk fostring, er dette like bra som Brann-gull.
– Det gamle skulebygget kom på plass i 1963, same år som Brann vann gull sist. No har både vi og fotballaget grunn til å sleppa jubelen laus, seier han.

Ikkje idrettsbygg. I Sjøforsvaret har fleire aktørar ved marinebasen jobba over lengre tid for å få det nye senteret på plass. Dersom Stortinget stiller seg viljug bak budsjettforslaget, kan bygginga ta til før sommaren 2008, og anlegget vera open for brukarane innan årsskiftet 2009/2010.
– Det er viktig at du skriv militært treningssenter og ikkje idrettsbygg, presiserar Ringdal.
– Dette skal nemleg vera eit samlingssenter for den operative marinen. Bassenget blir blant anna spesialdesigna for dykking, og vi vil få inn ei skuteside som skal simulere ein fregatt – dette for å gjera trening i basseng meir realistisk.

Lekkasjar og mugg. Tidlegare i år inviterte Sjøforsvaret til arkitektkonkurranse. Longva Arkitekter sitt forslag vann konkurransen. Gamlebygget frå 1963 er taparen og skal rivast.
– Det har vi blitt anbefala av to uavhengige firma om å gjere. Etter 44 år ber bygningen preg av lekkasjar og mugg. I tillegg har han berre kapasitet til å dekke ein firedel av behovet, forklarar Ringdal.
Det nye treningssenteret får 4000 potensielle brukarar, og anlegget vil ha eit brutto bygningsareal på 7500 kvadratmeter. Utandørsområdet blir på omlag 30 000 kvadratmeter. Det blir fullt opp med fotballbingar, volleyballbane, løpebane, hinderbane, klatretårn og anlegg for aktivitetar i og ved sjøen.
– Det skal bli eit senter som er spesialdesigna for å trene opp sjømilitært personell, seier potensiell budsjettvinnar André Ringdal.

VIDAR HOPE vh@fofo.no